Ons almal ken daardie oomblikke van frustrasie wanneer ons gebede lank neem om verhoor te word, veral as ons oortuig is dat ons versoeke binne God se wil is.
1Joh.5:14 En dit is die vrymoedigheid wat ons teenoor Hom het, dat Hy ons verhoor as ons iets vra volgens sy wil.”
Dit lei ons tot die kernvraag: Waarom lei Hy ons op die lang pad? Die antwoord is duidelik: God gebruik dikwels die lang pad, want dit vorm karakter en geestelike groei wat die kortpad uitsluit. Hierdie reis is egter nie ‘n poging om onsself te bewys nie. Inteendeel, niks daarvan gaan oor die verdien van Sy guns nie, maar bloot om Sy wysheid en getrouheid te leer ken. Hierna volg ‘n paar skrifgebaseerde redes hiervoor.
1. Die lang roete kweek afhanklikheid teenoor God eerder as selfstandigheid. Onthou dat God Israel deur die woestyn gelei het met die doel om hulle te verootmoedig en op die proef te stel. Ons moet ook leer dat die mens lewe van alles wat uit die mond van die Here uitgaan wat beteken dat God se woord (die Bybel binne die korrekte konteks vertolk) die fisieke werklikheid onderskraag.
Deut.8:2 “En jy moet dink aan die hele pad waarlangs die HERE jou God jou nou veertig jaar lank in die woestyn gelei het tot jou verootmoediging en beproewing, om te weet wat in jou hart is, of jy sy gebooie sal hou of nie. 3 En Hy het jou verootmoedig en jou laat honger ly en jou die manna laat eet wat jy en jou vaders nie geken het nie, om aan jou bekend te maak dat die mens nie van brood alleen lewe nie, maar dat die mens lewe van alles wat uit die mond van die HERE uitgaan.”
Hierdie reis is ontwerp om Israel te leer dat hulle van God se voorsienigheid afhanklik is, sodat hulle op Sy voorsiening eerder as op hul eie krag en wysheid sou steun. God wil hulle nie skade aandoen of vernietig nie, maar Hy wil Sy voorsienigheid aan hulle openbaar. Toepassing: Innige vertroue/geloof groei nie in gemak nie; dit blom wanneer ons op God moet steun omdat niks anders werk nie. Hierdie lang roete bring ‘n dieper verhouding met God tot stand, wat ons leer om op Sy goedheid en leiding te vertrou.
2. Die lang roete beskerm ons teen gevegte waarvoor ons nog nie voorbereid is nie. In Eksodus 13:17 het God die kortpad na Kanaän vermy, uit vrees dat Israel by die aanskouing van oorlog sou terugdeins.
Ex.13:17 “Toe Farao die volk laat trek het, het God hulle nie op die pad na die land van die Filistyne gelei nie, alhoewel dit nader was; want God het gesê: Die volk kan dalk berou kry as hulle oorlog sien, en teruggaan na Egipte.”
God was nie besig om Israel te straf nie, maar Hy was eerder besig om hul toekoms te beskerm.
Toepassing: God weet waar ons swakhede lê, en daarom sou sekere kortpaaie ons benadeel of selfs vernietig. Hy ken ons immers beter as wat ons onsself ken en weet wat die beste vir ons is. Onthou altyd dat die lang roete as ‘n verskansing dien teen uitdagings wat ons op sekere tye van ons lewe nog nie kan hanteer nie.
3. Die lang pad verwyder ons van die bande wat ons aan die verlede gekluister het. Israel moes so ver die wildernis in trek dat terugkeer na Egipte nie langer ‘n praktiese opsie was nie. Partykeer neem God ons met die ompad juis om ons van ou verhoudings en gewoontes wat ons weer sou kon bind, los te maak. Hy was nie besig om die uitweg te bemoeilik nie, maar eerder om die seëninge en vryheid te verseker.
Toepassing: Ons hemelse Vader wil nie hê dat ons opnuut vasgevang word deur vorige geestelike skadelike verhoudings en gewoontes nie. God is ‘n God van seëning en vrymaking, nie van verslawing en knegskap nie.
4. Die lang pad wat God Israel laat bewandel het, het Sy genade verheerlik en hulle gehelp om die volle diepte daarvan te waardeer. As God hulle sonder meer na die oorwinning gelei het, sou Israel moontlik die fout maak om self die eer daarvoor te neem.
Deut.8:17 “en jy in jou hart dink: My krag en die sterkte van my hand het vir my hierdie rykdom verwerwe. 18 Maar dink aan die HERE jou God, dat dit Hy is wat jou krag gee om rykdom te verwerwe, dat Hy sy verbond kan bevestig wat Hy aan jou vaders met ‘n eed beloof het, soos dit vandag is.”
Toespassing: Dit is juis deur die lang en moeilike reis dat God se genade vir ons duidelik sigbaar word. Dit gebeur veral wanneer ons Sy hulp en sorg te midde van ons nood en swaarkry ervaar.
Ef.3:18 “en julle in staat kan wees om saam met al die heiliges ten volle te begryp wat die breedte en lengte en diepte en hoogte is, 19 en die liefde van Christus te ken wat die kennis oortref, sodat julle vervul kan word tot al die volheid van God. 20 En aan Hom wat mag het om te doen ver bo alles wat ons bid of dink, volgens die krag wat in ons werk, 21 aan Hom die heerlikheid in die gemeente in Christus Jesus deur alle geslagte tot in ewigheid! Amen.
Filip.4:12 Ek weet om verneder te word, ek weet ook om oorvloed te hê; in elke opsig en in alle dinge is ek onderrig: om versadig te word sowel as om honger te ly, om oorvloed te hê sowel as om gebrek te ly. 13 Ek is tot alles in staat deur Christus wat my krag gee.”
Wanneer die pad lank en swaar is en God steeds voorsien, word Sy genade met ‘n ongekende glans geopenbaar.
5. Die lang en soms moeilike roete openbaar en beklemtoon juis God se teenwoordigheid, liefde, wysheid en almag.
Ex.13:21 “En die HERE het voor hulle uitgetrek, bedags in ‘n wolkkolom om hulle op die pad te lei, en snags in ‘n vuurkolom om hulle voor te lig, sodat hulle dag en nag kon trek. 22 Die wolkkolom het nie bedags en die vuurkolom nie snags voor die volk gewyk nie.”
Die wolk- en vuurkolom wat die Israeliete bedags en snags gelei het, was vir hulle ‘n bewys dat God in alle omstandighede by hulle was. God het nie vir Israel opdrag gegee om self hulle weg te vind nie, maar Hy het vir hulle gesê om Sy teenwoordigheid te volg.
Toepassing: Die ompad of lang pad dien nie as bewys dat God nie met ons is of ons nie raaksien nie, maar dit demonstreer eerder Sy liefdevolle koestering, voorsienigheid en teenwoordigheid aan ons. Ons moet Hom vertrou, wetende dat ons nooit alleen is en dat Hy ons nooit sal verlaat nie.
Matt.28:20 “En kyk, Ek is met julle al die dae tot aan die voleinding van die wêreld. Amen.” (sien ook Heb.13:5; Joh.14:16-17)
Die moeilike roete beteken nie verlating nie, maar dit is die duidelikste openbaring van Sy liefde en getrouheid. Hierdie proses is van kardinale belang vir volhoubare verandering.
6. Die lang pad getuig van God se getrouheid aan Israel en dien as ‘n voorbeeld aan die hele mensdom.
Ps.66:8 “Loof, volke, onse God, en laat hoor die stem wat Hom roem — 9 wat aan ons siel die lewe gee en nie toelaat dat ons voet wankel nie. 10 Want U het ons getoets, o God, U het ons gelouter soos ‘n mens silwer louter. 11 U het ons in die net gebring, ‘n swaar las op ons heupe gelê. 12 U het mense oor ons hoof laat ry; ons het in die vuur en in die water gekom, maar U het ons uitgelei in die oorvloed.”
Toespassing: Die beproewinge wat ons geduldig verduur, word verhale van verlossing wat God verheerlik en die geloof van ons medemense versterk.
Jak.1:2 “Ag dit louter vreugde, my broeders, wanneer julle in allerhande versoekinge val, 3 omdat julle weet dat die beproewing van julle geloof lydsaamheid (volhardende geduld)bewerk. 4 Maar die lydsaamheid moet tot volle verwerkliking kom, sodat julle volmaaken sonder gebrek kan wees en in niks kortkom nie.
Jak.5:11 “Kyk, ons reken hulle geluksalig wat verdra. Julle het gehoor van die lydsaamheid van Job, en julle het die einddoel van die Here met hom gesien, dat die Here vol medelye en ontferming is.”
7. Die lang reis maak ons gereed vir seëninge wat ons tans nog nie geestelik volwasse genoeg is om te ontvang nie. Voordat die Israeliete die Beloofde Land kon binnegaan, moes die lang trek deur die wildernis hulle voorberei. Hierdie tog het hulle gedwing om deugde soos moed, gehoorsaamheid, geduld en eenheid te ontwikkel, iets wat slawerny in Egipte verhoed het.
Toepassing: Net so dien die lang reis ook vir ons wat tydens die Dispensasie van die Kerk leef as ‘n voorbereiding vir die seëninge wat God vir ons voorberei het, terwyl dit ons innerlik ryp maak om dit met die nodige verantwoordelikheid te ontvang en dit op die regte wyse te kan hanteer. Dit is God se wil om ons oorvloedig te seën en ons noodsaaklike begeertes te bevredig. ‘n Godgegewe seën kan maklik in ‘n vloek verander indien God nie die gelowige behoorlik vir daardie seëning voorberei het nie.
Luk.11:11 “En vir watter vader onder julle sal sy seun brood vra, en hy sal hom ‘n klip gee; of ook ‘n vis, en hy sal hom in plaas van ‘n vis ‘n slang gee;”
Dink mooi oor hierdie feit na. Dit sou immers absolute waansin wees om vir ‘n driejarige ‘n gelaaide pistool te gee om homself te beskerm. ‘n Genadegawe wat volgens God se terme en op Sy tyd ontvang word, is veel genotvoller, en geen leed gaan daarmee gepaard nie.
Ter afsluiting: God kies die lang pad vir Sy mense, nie uit wreedheid, afsydigheid of die eis van prestasie nie. Inteendeel, Hy doen dit omdat Sy liefde te groot is om die seën te skenk voordat Hy jou hart voorberei het om dit ten volle te kan geniet. Hierdie weg is nooit onnodig of ‘n vermorsing nie. Geen enkele tree, geen enkele traan en geen enkele oomblik is tevergeefs nie. Wanneer dit voel dat God te lank neem om jou gebede te verhoor, moet jy volhardend geduldig wees en Hom vertrou, want die dag sal kom wanneer jy Hom vir hierdie wagtyd sal bedank.
Seën groete.
Vic
Lees gerus hierdie reeks artikels in volgorde. Dit sal jou help om ‘n Bybelse raamwerk vir die geskiedenis van die skepping te verstaan.
Die Dispensasies ‘n Skriftuurlike perspektief
Dispensasie van Onskuld
Die Dispensasie van Menslike Gewete
Die Dispensasie van Menslike Owerheid
Die Dispensasie van Belofte. Deel Een
Die dispensasie van belofte. Deel 2
Die Dispensasie van die Wet. Deel 1
Die Dispensasie van die Wet. Deel 2
Die Dispensasie van die Kerk. Deel een
Die Dispensasie van die Kerk. Deel 2
Belangrike feite aangaande die kerk. Deel 1
Belangrike feite aangaande die kerk. Deel 2
Die Messiaanse Koninkryk van Christus op aarde. Deel 1
Die Messiaanse Koninkryk van Christus op aarde. Deel 2
Die Messiaanse Koninkryk van Christus op aarde. Deel 3
Die Messiaanse Koninkryk van Christus op aarde. Deel 4
Die Messiaanse Koninkryk van Christus op aarde. Deel 5
Die Dispensasie van die Koninkryk
Die Ewigheid
Die volgende twee artikels kan ook as profetiese aanhangsels gelees word.
Dit is God wat Israel in hulle eie land hervestig.
Israel en die oorlog van Gog en Magog Esegiël 38–39
Die Wegraping. Deel 1
Die Wegraping. Deel 2
Die Wegraping. Deel 3