Daar heers groot omstredenheid rondom die kwessie van kinderdoop vs grootdoop en onlangs het ek ‘n epos van ‘n persoon ontvang wat juis met hierdie vraagstuk worstel. Ek gaan die genoemde epos in dele opbreek en dit d.m.v. die “jou vraag/stelling ” en “antwoord” metode beantwoord. Dit is my bede dat hierdie artikel meer lig op die onderwerp sal werp, en ek moet vooraf meld dat elke individuele persoon verantwoordelik is om seker te maak dat dit wat aan hom verkondig word uit die skrifte geregverdig kan word. God gaan elkeen van ons verantwoordelik hou vir die keuses wat ons maak. Ons moet vas oortuig wees van dit wat ons glo en hoekom ons dit glo. Die Here het ons Sy woord gegee waarin Hy Sy wil aan ons bekendgemaak het. In hierdie opsig moet ons God toelaat om vir Homself te praat, en ons moet met alle erns teen die versoeking waak om ons vooropgestelde idees (en tradisies) in die Bybel in te lees. God het die skrifte aan ons gegee sodat ons dit kan verstaan, en dan op grond van daardie Godgegewe openbarings ‘n keuse kan maak of ons dit gaan eerbiedig of nie.

God is ‘n God van logika en hierdie feit vloei uit Sy attribute van alwetendheid uit. Omrede God die mens na Sy beeld geskape het, is een kenmerk van die mens sy kapasiteit om binne die raamwerk van sy beperkte menslike vermoëns ook logies te dink. God het met hierdie wete die skrifte aan ons gegee en Hy verwag dat ons dit moet kan verstaan. Daar is niks in die skrifte wat in stryd met die mens se kapasiteit om logies te dink in botsing kom nie, en dit juis omrede God ‘n logiese God is en Hy ons in Sy beeld geskape het. Of God se logika, soos wat ons dit in die skrifte vind, is deur die mens op ‘n logiese wyse verstaanbaar of daar kan geen betekenisvolle Goddelike openbaring wees nie. God is alwetend en Hy gaan nie aan die mens die skrifte gee indien die mens nie oor die kapasiteit beskik om Sy woord te verstaan nie. God spreek met ons deur Sy woord, en verwag van ons om, d.m.v. die inwerking van die Heilige Gees, bybelstudie te doen om vas te stel wat Hy werklik aan ons wil sê. Vir die mens om in staat te wees om God in hierdie opsig te eerbiedig, moes God die mens met die kapasiteit geskape het om Sy woord te kan verstaan, anders sou daar geen sin in die gee van die geïnspireerde skrifte wees nie. God verwag van elke persoon om d.m.v. korrekte hermeneutiese (skrifuitleg) metodes seker te maak dat die skrifte reg verstaan en toepas word. Die skrifte moet dus op ‘n konsekwente, letterlike, grammatiese en historiese wyse geïnterpreteer word.

Jou Stelling: Goeiedag. Ek is as kind gedoop in die NG Kerk. Ek het intussen die NG Kerk verlaat, maar luister nog steeds na preke van NG predikers maar ook predikers van ander denominasies. Ek het in een van u stukke gelees dat “julle” glo aan nagmaal en die doop en dan onderdompeling tussen hakies.

Antwoord: Ja, ons glo onomwonde dat die nagmaal en doop, na aanvanklike geloof in die evangelie en wedergeboorte, die twee ordonnansies is wat Christus vir die kerk ingestel het. Lees asseblief die volgende teksgedeeltes self. Baie van genoemde teksgedeeltes sal weer later in hierdie artikel in meer detail aangehaal word.
1Kor.11:23 “Want ek het van die Here ontvang wat ek ook aan julle oorgelewer het, dat die Here Jesus in die nag waarin Hy verraai is, brood geneem het; 24 en nadat Hy gedank het, het Hy dit gebreek en gesê: Neem, eet; dit is my liggaam wat vir julle gebreek word; doen dit tot my gedagtenis. 25 Net so ook die beker ná die ete, met die woorde: Hierdie beker is die nuwe testament in my bloed; doen dit, so dikwels as julle daaruit drink, tot my gedagtenis. 26 Want so dikwels as julle hierdie brood eet en hierdie beker drink, verkondig julle die dood van die Here totdat Hy kom.”
Matt.28:19 en Hand.2:40-41, wat oor die doop handel, sal ek later in hierdie artikel aanhaal en bespreek.

Sover dit die “julle” aanbetref, sluit dit my gesin en die meeste lesers van hierdie webtuiste in. Sonder my vrou en twee ander mense (wat my broer en sy gesin insluit) se opofferings sou hierdie bediening nie meer moontlik gewees het nie. So in hierdie opsig praat ek van “ons” want hulle vorm ‘n onontbeerlike deel van hierdie bediening.

Jou stelling: Daar is so ‘n groot stryery en argumente van beide kante, groot doop vs klein doop dat die een Christen die ander aanval en behoorlik slegsê.

Antwoord: Ongelukkig is dit soms die geval aan beide kante van die spektrum, en in die verlede is gelowiges soos byvoorbeeld die anabaptiste vir hulle geloof in groot doop na wedergeboorte deur die Rooms Katolieke kerk, asook sommige hervormers, soos byvoorbeeld Zwingli en Martin Luther, tot die dood vervolg. Diesulke optredes is in stryd met God se woord en daar is geen regverdiging daarvoor in die skrifte nie. Daarenteen moet ons streef om altyd korrekte leerstellings te handhaaf en dit sluit die leerstelling van die doop in. Twee teenstrydige idees (kinderdoop en doop na die glo van die evangelie en wedergeboorte) kan nie korrek wees nie. Daarom moet ons poog om die skrifte korrek te verklaar en die regte leerstellings te glo. Die skrifte maan ons juis om dit te doen:
2Tim.2:15 Lê jou daarop toe om jou beproef voor God te stel as ‘n werker wat hom nie hoef te skaam nie, wat die woord van die waarheid reg sny.”

Jou stelling: Ek kry die slegsêery en aanvalle meestal van die mense wat in die groot doop glo.

Antwoord: Dis is en bly altyd verkeerd om mekaar sleg te sê. Daar is egter ruimte vir korreksie waar verkeerde leerstellings aangekleef word, en God verwag boonop van alle gelowiges om leerbaar te wees.
2Tim.4:2 “verkondig die woord; hou aan tydig en ontydig; weerlê, (dwaalleerstellings) bestraf, vermaan in alle lankmoedigheid en lering; (Wat die korrekte leerstelling van die doop insluit)
Om ‘n persoon te korrigeer is nie altyd ‘n aanval op daardie persoon nie. Indien ons werklik ‘n persoon lief het, dan sal ons poog om hom te korrigeer omrede ons net die beste vir sodanige persoon wil hê.
2Kor.13:11 “Verder, broeders, wees bly; word volmaak; (dit sluit korrekte leerstellings in) laat julle vermaan; (ons moenie altyd aanstoot neem as iemand ons vanuit die skrifte wil korrigeer nie) wees eensgesind; hou vrede, en die God van liefde en vrede sal met julle wees.”Dit bly egter ‘n grondige beginsel om mekaar in liefde te korrigeer sonder om mekaar sleg te sê.

Jou stelling: Baie van hul redenasie is net …..jy kan nie ‘n besluit maak om Jesus te volg as jy ‘n baba is nie. Dit is 80% van die mense se antwoorde.

Antwoord: Het jy al ooit self die skrifte bestudeer om te kyk of hulle dalk ‘n geldige punt beet het? Nêrens vind ons in die skrifte dat die kerk aangesê word om kinderdoop toe te pas nie. Gaan kyk maar vir jouself. Daarenteen word die kerk aangesê om die evangelie te gaan verkondig, en om diegene wat die evangelie geglo het te doop. Die skrifte maak dit is duidelik dat ‘n persoon eers die evangelie moet kan verstaan alvorens hy ‘n keuse kan maak of hy dit wil glo of nie. Let op die volgorde van die onderstaande opdrag:
Mark.16:15 “En Hy (die Here Jesus Christus)het vir hulle gesê: Gaan die hele wêreld in en verkondig die evangelie aan die ganse mensdom. 16 Hy wat glo (fase een van sy verlossing, naamlik wedergeboorte afgehandel) en hom laat doop, sal gered word; maar hy wat nie glo nie, sal veroordeel word.”
Let wel, dit is die glo van die evangelie wat ‘n persoon red nie die doop nie. Ek sal jou ten sterkste aanraai om die artikel “Die doop vorm nie deel van die evangelie nie” asook die artikel “Die drie fases van verlossing” noukeurig deur te lees.) In vers 16 merk ons dat ‘n persoon se ongeloof die oorsaak is omrede hy verlore gaan en nie die feit dat hy nie gedoop is nie. Boonop is dit opmerklik dat die Here Jesus Christus die glo van die evangelie voor die doop plaas, en die opdrag om gedoop te word, slegs aan mense wat alreeds die evangelie geglo het voorgehou word. Daar is absoluut geen ander wyse waarop hierdie teksgedeelte/opdrag anders verklaar kan word nie.

Hier is nog ‘n voorbeeld:
Matt.28:19 “Gaan dan heen, maak dissipels van al die nasies, en doop hulle in die Naam van die Vader en die Seun en die Heilige Gees; en leer hulle ( die nuwe dissipels) om alles te onderhou wat Ek julle beveel het. (en dit sluit die grootdoop in) 20 En kyk, Ek is met julle al die dae tot aan die voleinding van die wêreld. Amen.
Hand.2:40 “En met baie ander woorde het hy hulle besweer en vermaan en gesê: Laat julle red uit hierdie verkeerde geslag. 41 Die wat toe sy woord met blydskap aangeneem (verstaan en geglo) het is gedoop; en daar is op dié dag omtrent drie duisend siele toegebring.”
Let weer op die volgorde van gebeure, eers die glo van die evangelie wat dan deur die waterdoop gevolg moet word.
Hand.18:8 En Crispus, die hoof van die sinagoge, het met sy hele huisgesin in die Here geglo; (dit is duidelik dat klein kindertjies nie die evangelie kan verstaan en glo nie. Die doop volg na afloop van die verstaan en glo van die evangelie en daarom moes al Crispus se kinders alreeds die ouderdom van toerekenbaarheid bereik het.) en ook baie van die Korinthiërs het, toe hulle hom hoor, gelowig geword (geglo) en is gedoop. (let weereens op die volgorde, naamlik die doop volg na afloop van wedergeboorte)
‘n Persoon moet dus eers bely dat hy die evangelie verstaan en glo alvorens hy gedoop kan word. Hierdie feit sluit die leerstelling van die kinderdoop heeltemal uit.

Tydens die Kerk Dispensasie is slegs mense wat alreeds met die Heilige Gees verseël is kinders van God, en ‘n persoon word slegs deur die Heilige Gees verseël die oomblik wanneer daardie persoon die evangelie glo en nie voor die tyd nie. Die woord van God stel hierdie feit baie duidelik, en daar kan geen misverstand wees nie, naamlik:
Ef.1:13 “in wie julle ook, nadat julle die woord van die waarheid, die evangelie van julle redding, gehoor het, in wie julle, nadat julle ook geglo het, verseël is met die Heilige Gees van die belofte,”
Let weer op die volgorde. Alle mense word in sonde gebore en dit sluit babatjies in. ‘n Persoon kan slegs wedergebore raak, indien daardie persoon die evangelie verstaan en glo, en dan alleenlik word die persoon deur God se Gees verseël en daarom maak Paulus die volgende stelling:
Rom.8:9 “julle is egter nie in die vlees nie, maar in die Gees, as naamlik die Gees van God in julle (gelowiges wat die evangelie verstaan en geglo het) woon. Maar as iemand die Gees van Christus nie het nie, dié behoort nie aan Hom nie.”
En die wyse waarop wedergeboorte plaasvind is die glo van die evangelie en die evangelie alleenlik:
Rom.1:16 “Want ek skaam my nie oor die evangelie van Christus nie, want dit is ‘n krag van God tot redding vir elkeen wat glo, eerste vir die Jood en ook vir die Griek.”
Dit beteken geensins dat babatjies verlore sal gaan indien hulle tot sterwe kom voordat hulle oor die vermoë beskik om die evangelie te verstaan en glo nie. Lees gerus die artikel “Gaan klein kindertjies hemel toe as hulle sterf?” Hierdie feit geld vir alle babas en klein kindertjies wat tot sterwe kom voordat hulle intellektueel in staat is om die evangelie te verstaan. Indien mens toelaat dat God vir Homself in Sy woord praat, dan is dit duidelik dat die leerstelling van die kinderdoop nie ‘n Bybelse leerstelling is nie, maar ‘n leerstelling wat in die skrifte ingelees is.

Jou stelling: Soos genoem is ek klein gedoop en is nie van plan om my nou te laat groot doop nie.

My antwoord: Ek kan die skrif slegs aan jou vir oorweging voorlê, wat jy daarmee maak is jou keuse. En nee, ek gaan jou nie slegsê nie.

Jou vraag: My vraag is nou, wat van al die 1000de mense wat as kinders gedoop is, en Jesus as hul verlosser aangeneem het, en ‘n heilige lewe soos die Bybel van ons verwag om te leef geleef het. Baie van hulle kan vir ons ‘n dag en datum gee wanneer hulle tot bekering gekom het en hoe hul lewe verander het daarna. Wat word van ons wat klein gedoop is? Gaan ons hel toe? Wat van die mense wat groot gedoop is en ‘n absolute onheilige leefstyl het? Gaan hulle voor my in die ry staan om hemel toe te gaan?

My antwoord: ‘n Persoon gaan nie hemel of hel toe omrede hy gedoop is nie. (dit sluit die kinderdoop of groot doop in) Iemand wat so ‘n leerstelling verkondig, verkondig ‘n werke evangelie wat niemand sal red nie. Wat bepaal of ‘n persoon hemel of hel toe gaan, is die feit dat daardie persoon die evangelie geglo het of nie. Niks anders nie. Mens kan nie werk om die ewige lewe te bekom of te behou nie (lees asseblief die artikel “Bekeer, bekering en die ewige lewe”). ‘n Persoon wat die evangelie geglo het kan ook nie verlore gaan nie al sondig hy. Lees asseblief ook die artikels “Gevolge en verliese a.g.v. sonde in ‘n gelowige se lewe”, asook “Die doop vorm nie deel van die evangelie nie”, en “Gaan ‘n persoon hel toe as hulle vergeet om hulle sonde te bely.” en die artikel “Reddende geloof vs generiese geloof”. In hierdie artikels word jou vrae in meer diepte beantwoord. Daar is ook baie ander artikels op die webtuiste wat oor hierdie onderwerp handel en ek raai jou aan om dit gerus te lees. En onthou, die doop wat ‘n menslike werk is, vorm nie deel van die evangelie nie en is dus nie ‘n vereiste om die ewige lewe te ontvang nie. Die ewige lewe word nie deur werke, deur reformasie in eie krag, of deur ‘n heilige lewe, of deur die belydende Christendom, of deur kerk lidmaatskap of deur enige ordonnansie bekom nie, maar slegs grond van geloof in die evangelie.
1Kor.15:1 Broeders, ek maak julle die evangelie bekend wat ek aan julle verkondig het, wat julle ook aangeneem het, waarin julle ook staan, 2 waardeur julle ook gered word as julle daaraan vashou op die wyse waarop ek dit aan julle verkondig het, of julle moet tevergeefs geglo het. 3 Want in die eerste plek het ek aan julle oorgelewer wat ek ook ontvang het, dat Christus vir ons sondes gesterf het volgens die Skrifte; 4 en dat Hy begrawe is, en dat Hy op die derde dag opgewek is volgens die Skrifte;”

Jou stelling: Ek val niemand aan nie. Ek is nie teen die groot doop nie maar as ek as baba klein gedoop is, gaan ek my nie weer laat doop nie.

Antwoord:
Of jy jou laat doop of nie is jou keuse. Ek voel net dat ek graag die woord van God korrek wil uitlê en dan daardie gesonde Bybelse leerstellings in my eie lewe toepas. Dit is wat God van my verwag, en dit is wat ek graag sal wil doen en daarom het ek my laat doop. Ek kom ook uit die N.G. Kerk agtergrond uit en is ook as baba gedoop. En nee ek is nie ‘n charismaat nie. Ek kan egter geen regverdiging vir die kinderdoop in die skrifte vind nie. Ek stem ook nie saam met die calvinistiese leerstelling van die uitverkiesing soos wat hulle dit verkondig nie. (Ek raai jou aan om ook gerus die artikel “Wil God almal verlos” sorgvuldig deur te lees.)

Jou stelling/vraag:
Ek glo God het my ook in Sy verbondsvolk (is dit die regte woord) opgeneem.

Antwoord: As jy slegs die evangelie verstaan en geglo het, dan vorm jy deel van die ware kerk en besit jy die ewige lewe as ewige besitting. ( wat jy nooit kan verloor nie. Lees gerus die artikel “Die ewige sekuriteit van die gelowige”, asook die artikel “Die proponente van werkheiligheid se herdefiniëring van geloof” wat ook ‘n logiese uitvloeisel van calvinisme is.) Jy moet ook duidelik verstaan dat die kerk en die volk Israel twee afsonderlike entiteite is. Slegs Israel is God se verbondsvolk, nie die kerk nie. Die leerstelling wat verklaar dat die Kerk Israel as God se verbondsvolk vervang het is ‘n dwaalleerstelling wat ook in die gereformeerde kerke verkondig word. Hierdie leerstelling staan as vervanging teologie bekend en dit bring ‘n persoon wat daarin glo in botsing met wat God in Sy woord verklaar. Ek sal jou ten sterkste aanraai om die artikel “Het die Kerk Israel as God se verbondsvolk vervang?” sorgvuldig te bestudeer. Die Kerk wat die liggaam van Christus is, is nie die “ware” Israel, of Israel se vervanging of selfs die “geestelike” Israel nie. Die Kerk is nie Israel nie en sal nooit Israel wees nie. Ons moet toelaat dat God vir Homself in Sy woord praat en nie ons leerstellings in die Bybel inlees nie. Indien God van “Israel” praat dan moet ons weet dat Hy “Israel” bedoel en nie die kerk nie. God is nie ‘n God van verwarring nie.

Jou vraag: As dit nie ‘n vereiste is vir ons nadoodse bestaan nie, waarom die aanval op die kinderdoop?

My antwoord: God is ‘n God van waarheid en in Hom is geen valsheid nie.
Joh.4:24 “God is Gees; en die wat Hom aanbid, moet in gees en waarheid (wat korrekte Bybelse leerstellings insluit) aanbid.”
God verwag van ons om Sy woord reg uit te lê, juis omrede valse leerstelling vals is en nie met Sy attribute versoen kan word nie. ‘n Persoon kan byvoorbeeld beweer dat Hy God in alles eer, indien Hy nie ‘n poging aanwend om die skrifte reg te verklaar en dit in sy lewe toe te pas nie.
Luk.6:46 “En wat noem julle My: Here, Here! en doen nie wat Ek sê nie?”
Om aan enige valse leerstelling vas te hou wetende dat dit vals is is sonde en kom nie van God af nie.
2Tim.2:15 Lê jou daarop toe om jou beproef voor God te stel as ‘n werker wat hom nie hoef te skaam nie, wat die woord van die waarheid reg sny.”

Ongelukkig is daar predikers wat God se woord in twyfel trek, en wat tot uiterste lengtes sal gaan om hulle dwaalleerstelling van die kinderdoop te regverdig. Ek het eendag gesit en luister hoe ‘n dominee van die “strooiman tegniek” gebruik maak, en Handeling 8:35-38 aanhaal en aanval om te demonstreer dat hy diegene wat die groot doop verkondig weerlê het. Ek gaan net vir interessantheid die teksgedeelte aanhaal en kortliks bespreek, naamlik:
Hand.8:35“En Filippus het sy mond geopen en van hierdie Skrif af begin en die evangelie van Jesus aan hom verkondig. 36 En terwyl hulle voortreis op die pad, kom hulle by water; en die hofdienaar sê vir hom: Daar is water; wat verhinder my om gedoop te word? 37 Toe sê Filippus: As u glo met u hele hart, is dit geoorloof. En hy antwoord en sê: Ek glo dat Jesus Christus die Seun van God is. 38 En hy het beveel dat die wa moes stilhou; en hulle het altwee in die water afgeklim, Filippus en die hofdienaar; en hy het hom gedoop.” (let weer op die volgorde van gebeure en die vereiste om te glo alvorens ‘n persoon gedoop kan word”)
Volgens die dominee is die stelling “As u glo met u hele hart, is dit geoorloof.” eers later deur iemand anders in die skrifte ingeskryf en vorm nie deel van die oorspronklike grondteks nie (‘n aanname wat liberale teoloë gewoonlik ook maak). Hy het sodoende sy lidmate op ‘n baie subtiele wyse doelbewus verlei deurdat hy die teksgedeeltes, soos wat ek alreeds in hierdie artikel bespreek het, heeltemal geïgnoreer het en slegs sy aanval op hierdie een teksgedeelte gefokus het. Hy het baie goed geweet dat sy taktiek nie op die ander teksgedeeltes met sukses toegepas kon word nie, en daarom het hy hulle gerieflikheidshalwe heeltemal geïgnoreer. Wat hierdie dominee gedoen het is ‘n absolute tragedie, want baie mense luister na hom en vertrou hom om die hele waarheid van God aan hulle te verkondig. Hy moet onthou dat Hy wel eendag voor God rekenskap sal moet gee vir dit wat hy verkondig het. So ‘n persoon kan nie soos Paulus verklaar dat hy God se hele openbaring aan sy lidmate verkondig het nie, naamlik:
Hand.20:26 “Daarom betuig ek aan julle op hierdie dag dat ek rein is van die bloed van almal. 27 Want ek het nie nagelaat om aan julle die hele raad van God te verkondig nie.”
Die Here Jesus Christus se opmerking geld ook vir mense wat God se opdragte op hierdie wyse ongedaan wil maak:
Matt.15:9 “Maar tevergeefs vereer hulle My deur leringe te leer wat gebooie van mense is.”

Jou stelling: Daar is natuurlik ander aspekte waarmee ek ook verskillende sienings het soos bv vroulike predikante of vroulike ouderlinge. Ek is teen die aanstel van n vroulike predikant wat gesag uitvoer oor mans in die gemeente. Of vroue ouderlinge wat aangestel word in jou meer charismatiese kerke. In die kerk waar ek tans is, nie NG en ook nie AGS word die goed toegelaat. Wat ek hiermee wil sê is dat daar so baie dinge in die kerk aangaan waar 1000de gemeentelede verskil, en al die goed word nie altyd aangepraat nie maar daar word altyd n issue gemaak oor die klein doop vs die groot doop. En nou praat ek nie eens van gay regte en lgbtq+abcd-klmno nie.
Help asb. Ek luister graag. Dankie.

Antwoord: Ek stem heelhartig met jou saam dat daar ernstige dwaalleer in die belydende Christendom verkondig word. En daarom is dit juis so belangrik om die skrifte korrek te verklaar, maar ek stem egter nie met jou saam dat die fokus net op die kinderdoop gevestig word nie. Indien jy hierdie webtuiste gereeld lees, dan sal jy gou agterkom dat dit nie die geval is nie. Dit is juis die feit dat daar mense is wat God se woord verdraai om by hulle leerstellings in te pas dat die probleem ontstaan het. Dwaalleer van enige aard moet aangespreek en gekorrigeer word, en dit sluit die leerstelling van die kinderdoop in. Twee teenstrydige proposisies kan nooit versoen word nie en slegs een kan reg wees. En dit sluit die vraagstuk aangaande groot doop en kinderdoop in. Indien mens die skrifte sorgvuldig bestudeer, en skrif met skrif vergelyk, dan is dit baie duidelik dat die leerstelling van kinderdoop nêrens in die skrifte verkondig word nie en ook nie vanuit die skrifte verdedig kan word nie. Die kinderdoop is nie ‘n Bybelse leerstelling nie, maar is van buite die skrifte in die skrifte ingelees. Ons almal moet streef om volmaak voor God te staan en dit kan ons slegs doen indien ons korrekte leerstellings glo en verkondig.
Kol.1:28 “Hom verkondig ons, terwyl ons elke mens vermaan en elke mens in alle wysheid onderrig, om elke mens volmaak (wat korrekte Bybelse leerstellings insluit) in Christus Jesus voor te stel;”
En onthou, ons kan nie verklaar dat ons Hom werklik liefhet indien ons nie Sy gebooie nakom nie. Dit sluit die opdrag om na afloop van die glo van die evangelie gedoop te word in.
2Joh.1:6 “En dit is die liefde, dat ons wandel volgens sy gebooie. Dit is die gebod soos julle van die begin af gehoor het dat julle daarin moet wandel.”

Dit is my bede dat hierdie antwoord jou vrae beantwoord en dat dit jou in jou christelike wandel sal voorthelp.

Seën Groete!

Vic.