God verwag van alle gelowiges om mekaar lief te hê en goeie werke te verrig.
Joh.15:17 “Dit gebied Ek julle, dat julle mekaar moet liefhê.”
Die skrifte beveel ons ook om goed te doen en dat ons nie moet moeg word om goed te doen nie.
Gal.6:9 “En laat ons nie moeg word om goed te doen nie, want op die regte tyd sal ons maai as ons nie verslap nie. 10 Laat ons dan, terwyl ons geleentheid het, aan almal goed doen, maar die meeste aan die huisgenote van die geloof.”
Goeie werke is nie opsioneel nie en word van ons verag.
Ef.2:10 Want ons is sy maaksel, geskape in Christus Jesus tot goeie werke wat God voorberei het, sodat ons daarin kan wandel.
Maar soos wat ons in die artikels “Die Sondenatuur, ‘n skriftuurlike perspektief”, asook “Die sonde van lieg vir die Heilige Gees” gemerk het, word goeie werke wat met verkeerde motiewe gedoen word in baie gevalle sondige dade wat deur God verwerp word. Boonop het ons gemerk dat goeie dade wat as grondslag die gelowige se sondenatuur het geen ewigheidswaarde besit en ook geen genadeloon sal verdien nie. Maar wat behoort ons te motiveer om as Christene die Here te dien en in gehoorsaamheid te wandel? Met die skryf van hierdie artikel sal ek sewe motiverings redes hier weergee wat by God aanvaarbaar is en waarvoor Hy die gelowige sal beloon.
1. God se liefde:
Ware (Goddelike) liefde bring liefde voort.
1Joh.4:19 “Ons het Hom lief, omdat Hy ons eerste liefgehad het.”
‘n Gelowige wat met die Gees gevul is, en deur die Gees wandel, sal vanuit sy sondelose natuur werklike liefde manifesteer.
Gal.5:22 “Maar die vrug van die Gees is liefde, (ware liefde nie Fariseïese of valse liefde nie) blydskap, vrede, lankmoedigheid, vriendelikheid, goedheid, getrouheid, sagmoedigheid, selfbeheersing.”
God se liefde vir ons ken geen perke nie, en indien ons werklik hierdie feit besef skep dit in ons die begeerte om Hom in alles te behaag en om ons medemens lief te hê net soos wat Hy ons het.
2Kor.5:14 “Want die liefde van Christus dring ons, 15 omdat ons van oordeel is, dat as een vir almal gesterf het, hulle dan almal gesterf het; en Hy het vir almal gesterwe, sodat die wat lewe, nie meer vir hulself moet lewe nie, maar vir Hom wat vir hulle gesterf het en opgewek is.”
Joh.13:35 Hieraan sal almal weet dat julle my dissipels is, as julle liefde onder mekaar het.
Joh15:9 “Soos die Vader My liefgehad het, het Ek julle ook liefgehad. Bly in hierdie liefde van My.”
Ons is immers die geliefdes van God, as as Sy geliefdes behoort ons ook ons medemens uit ‘n suiwer hart met suiwer motiewe lief te hê.
2. Die Here Jesus Christus se gehoorsaamheid aan Sy Vader:
Die Here Jesus Christus het tydens Sy eerste koms aan ons ‘n volmaakte voorbeeld van nederige gehoorsaamheid en selfopofferende liefde nagelaat. Sy voorbeeld aan ons behoort ons te motiveer om net soos Hy op te tree, wetende dat Sy motiewe altyd absoluut suiwer was.
Joh.15:10 As julle my gebooie bewaar, sal julle in my liefde bly, net soos Ek die gebooie van my Vader bewaar en in sy liefde bly.
Dieselfde gesindheid behoort in ons te wees net soos wat dit in die Here Jesus Christus was. Hierdie beginsel geld ook vir wanneer dinge moeilike raak en ons wil moed opgee. Om hierdie rede het die skrywer van die brief aan die Hebreërs die volgende stelling gemaak:
Heb.12:1 “Daarom dan, terwyl ons so ‘n groot wolk van getuies rondom ons het, laat ons ook elke las aflê en die sonde wat ons so maklik omring, en met volharding die wedloop loop wat voor ons lê, 2 die oog gevestig op Jesus, die Leidsman en Voleinder van die geloof, wat vir die vreugde wat Hom voorgehou is, (wat die wete dat Hy ons verlossing sou bewerkstellig insluit) die kruis verdra het, die skande verag het en aan die regterkant van die troon van God gaan sit het. 3 Want julle moet ag gee op Hom wat so ‘n teëspraak van die sondaars teen Hom verdra het, sodat julle in jul siele nie vermoeid word en verslap nie.”
God is bewus van die feit dat ons toegewydheid aan Hom lyding en opofferings sou insluit. Opofferings en lyding vorm egter deel van God se wil vir ons in hierdie lewe en daarom het Petrus die volgende stelling gemaak, naamlik:
1Pet.2:21 “Want hiertoe is julle geroep, omdat Christus ook vir julle gely het en julle ‘n voorbeeld nagelaat het, sodat julle sy voetstappe kan navolg;”
Die Here Jesus Christus se voorbeeld behoort ons te motiveer om nie moedeloos te word en om te begin brom wanneer dinge moeilik raak nie. Ons weet mos immers dat Hy vir hulle wat na sy voorneme geroep is alles ten goede laat meewerk. (Rom.8:28) Die Here Jesus Christus se onwrikbare toewyding, onselfsugtigheid en volharding behoort ons aan te spoor om Hom en ons medemens getrou te dien. Daar is nie plek vir tou opgooi nie. Indien ons getrou voortgaan om God te dien en Hom getrou te volg dan sal Hy ons mildelik daarvoor beloon.
Rom.2:4 “Julle moet nie elkeen na sy eie belange omsien nie, maar elkeen ook na die ander s’n. 5 Want hierdie gesindheid moet in julle wees wat ook in Christus Jesus was. 6 Hy, wat in die gestalte van God was, het dit geen roof geag om aan God gelyk te wees nie, 7 maar het Homself ontledig deur die gestalte van ‘n dienskneg aan te neem en aan die mense gelyk geword; 8 en in gedaante gevind as ‘n mens, het Hy Homself verneder deur gehoorsaam te word tot die dood toe, ja, die dood van die kruis. 9 Daarom het God Hom ook uitermate verhoog en Hom ‘n naam gegee wat bo elke naam is,”
3. Die bemoediging van medegelowiges:
Ons sal nooit die volle impak van medegelowiges se gebede, ondersteuning, gemeenskap en selfs vermaninge aan hierdie kant van die graf begryp nie. Wanneer ons dit doen help ons mekaar om standvastig in die geloof te bly en in ons toewyding aan Christus te volhard. Dit is nie sonder rede dat God die volgende vermaninge in Sy woord laat opteken het nie, naamlik:
Gal.6:2 “Dra mekaar se laste en vervul so die wet van Christus.”
1Thess.5:11 “Daarom, bemoedig mekaar en bou die een die ander op, soos julle ook doen.”
God se doel vir die kerk is dat ons mekaar moet opbou, mekaar aanspreeklik hou, mekaar bemoedig sodat ons almal tot geestelike volwassenheid kan opgroei. (Ef.4:11-16) Ons moet mekaar aanmoedig om met die Gees gevul te bly, mekaar lief te hê en om goeie werke in die krag van die Heilige Gees te verrig.
Heb.10:24 “en laat ons (gelowiges) op mekaar ag gee om tot liefde en goeie werke aan te spoor;”
4. Die Begeerte om God te verheerlik:
Indien ons God werklik liefhet sal daar ‘n begeerte in ons hart ontstaan wat ons sal motiveer om Hom in alles te verheerlik en nie onsself nie. In hierdie opsig dien ons begeerte om God te verheerlik as motivering om goeie werke te verrig.
1Pet.4:11 “As iemand spreek, laat dit wees soos woorde van God; as iemand dien, laat dit wees soos uit die krag wat God verleen, sodat God in alles verheerlik kan word deur Jesus Christus, aan wie die heerlikheid en krag toekom tot in alle ewigheid. Amen.”
Baie pastore begeer, en geniet sterstatus, en gebruik die Here Jesus Christus se naam om hulle eie doelstellings te bereik en om hulleself te bemark. Hierdie stelling geld ook vir baie musikante se musiek vertonings. Baie “goeie werke” word verrig met die doel om deur mense gesien te word en dit gaan gewoonlik met publisiteit gepaard. Ons motief moet wees om God te verheerlik nie self nie.
1Kor.10:31 “Of julle dan eet of drink of enigiets doen, doen alles tot verheerliking van God.”
5. God se genade:
Ons dankbaarheid vir God se genade dien as motivering om Hom getrou te dien. Ons behoort God uit suiwer dankbaarheid te dien en nie uit dwang of valsheid nie. Dit was God se genade wat Paulus aangespoor het om God getrou te dien, naamlik:
1Kor.15:10 “Maar deur die genade van God is ek wat ek is, en sy genade aan my was nie tevergeefs nie; maar ek het oorvloediger gearbei as hulle almal; nogtans nie ek nie, maar die genade van God wat met my is.”
Baie gelowiges ondervind goeie werke en diens aan God (en ons medemens) as ‘n swaar las.Indien ons nie werklik die diepte en omvang van God se genade besef nie mag diens aan Hom en ons medemens dalk soos ‘n las voel. Maar sodra ons werklik die omvang van God se onverdienstelike guns besef, word dit wat vir ons ‘n las was in vreugdevolle arbeid verander. God se reddende genade behoort ons te motiveer om heilige lewens te lei, nie uit dwang nie maar uit dankbaarheid uit.
Tit.2:11”Want die reddende genade van God het aan alle mense verskyn 12 en leer ons om die goddeloosheid en wêreldse begeerlikhede te verloën, ingetoë en regverdig en vroom in die teenwoordige wêreld te lewe,”
Dankbaarheid vir God se barmhartighede behoort in goeie werke uitdrukking te vind. ‘n Begrip van God se barmhartighede behoort ons boonop tot selfopofferende diens aan te spoor en ons verder aan te spoor om ons liggame aan God as lewens offergawes aan te bied.
Rom.12:1 “Ek vermaan julle dan, broeders, by die ontferminge van God, dat julle jul liggame stel as ‘n lewende, heilige en aan God welgevallige offer dit is julle redelike godsdiens.”
6. Christus se koms vir die Kerk:
Die enige oomblik wegraping van die kerk dien as goeie motivering om heilige te lewe.
1Joh.3:2 “Geliefdes, nou is ons kinders van God, en dit is nog nie geopenbaar wat ons sal wees nie; maar ons weet dat ons, as Hy (met die wegraping) verskyn, aan Hom gelyk sal wees, omdat ons Hom sal sien soos Hy is. 3 En elkeen wat hierdie hoop op Hom het, reinig homself soos Hy rein is.
Ons bevind onsself nou in die laaste dae van die Kerk Dispensasie. Die wegraping kan enige tyd plaasvind en hierdie feit behoort ons te motiveer om die Here Jesus Christus getrou te dien. Dit sluit goeie werke op grond van God se genade deur geloof in die instaatstellende krag van die Heilige Gees in, en dit “terwyl ons die salige hoop en die verskyning van die heerlikheid verwag van die grote God en ons Verlosser, Jesus Christus,” (Tit.2:13). Die tyd om die Here Jesus Christus getrou te dien raak elke dag minder en daarom is dit van uiterste belang dat ons die Here se wil vir ons ken en dit deur geloof in die krag van die Heilige Gees in ons lewens toepas.
Ef.5:15 “Pas dan op dat julle nougeset wandel, nie as onwyse nie, maar as wyse; 16 en koop die tyd uit, omdat die dae boos is. 17 Daarom moet julle nie onverstandig wees nie, maar verstaan wat die wil van die Here is.”
7. Genadeloon:
Die begeerte om genadeloon bymekaar te maak is ‘n Godgegewe aanmoediging om gelowiges te kry om goeie werke binne die raamwerk van Sy wil te verrig. Die Here Jesus Christus het juis hierdie onderwerp aangeraak toe Hy die volgende stelling gemaak het, naamlik:
Matt.6:19 “Moenie vir julle skatte bymekaarmaak op die aarde, waar mot en roes verniel en waar diewe inbreek en steel nie; 20 maar maak vir julle skatte bymekaar in die hemel, waar geen mot of roes verniel nie en waar diewe nie inbreek en steel nie; 21 want waar julle skat is, daar sal julle hart ook wees.”
Slegs gelowiges sal voor die Regterstoel Oordeel van Christus moet verskyn want slegs gelowiges kan genadeloon verdien.
2Kor.5:10 “Want ons (alle gelowiges) moet almal voor die regterstoel van Christus verskyn, sodat elkeen kan ontvang wat hy deur die liggaam verrig het, volgens wat hy gedoen het, of dit goed is of kwaad.”
1Kor.3:11 “Want niemand kan ‘n ander fondament lê as wat daar gelê is nie, dit is Jesus Christus. 12 En as iemand op dié fondament bou goud, silwer, kosbare stene, hout, hooi, stoppels — 13 elkeen se werk sal aan die lig kom, want die dag sal dit aanwys, omdat dit deur vuur openbaar gemaak word; en die vuur sal elkeen se werk op die proef stel, hoedanig dit is. 14 As iemand se werk bly staan wat hy daarop gebou het, sal hy loon ontvang; 15 as iemand se werk verbrand word, sal hy skade ly; alhoewel hy self gered sal word, maar soos deur vuur heen.”
Dit is by die Regterstoel Oordeel van Christus waar God ons vir ons getroue diens aan Hom sal vergoed. Die Regterstoel Oordeel van Christus is niks anders as ‘n ere-seremonie nie. Dit is hier waar ons vir ons getroue diens aan die Here vereer sal word.
1Kor.15:58 “Daarom, my geliefde broeders, wees standvastig, onbeweeglik, altyd oorvloedig in die werk van die Here, omdat julle weet dat julle arbeid in die Here nie tevergeefs is nie.”
Alhoewel ‘n gelowige nie die gawe van die ewige lewe kan verbeur nie, kan hy egter genadeloon verbeur en in skaamte van die Regterstoel Oordeel van Christus af weggaan.
1Joh.2:28 “En nou, my kinders, bly in Hom, sodat ons vrymoedigheid kan hê wanneer Hy verskyn en nie beskaamd van Hom weggaan by sy wederkoms nie.
2Joh.1: 8 Wees op julle hoede, dat ons nie (genadeloon) verloor wat ons deur arbeid verkry het nie, maar ‘n volle loon ontvang”
Ter afsluiting: Ek het met opset God se tugtiging van Sy kinders nie by hierdie lys gevoeg nie, omrede God se tugtiging nie noodwendig as ‘n motiveerder vir die doen van goeie werke en diens aan ons medemens is nie. God se tugtiging kan help om ‘n gelowige wat in sonde wandel op die regte pad te bring, maar dit gaan nie ‘n persoon noodwendig motiveer om sy naaste in hulle nood by te staan nie.
1Kor.9:7 “Laat elkeen gee soos hy hom in sy hart voorneem, nie met droefheid of uit dwang nie, want God het ‘n blymoedige gewer lief.”
God kyk na die motiewe van die hart en Hy wil hê dat ons vanuit die grondslag van liefde optree en nie noodwendig uit dwang nie.
Filip.2:5 “Want hierdie gesindheid moet in julle wees wat ook in Christus Jesus was. 6 Hy, wat in die gestalte van God was, het dit geen roof geag om aan God gelyk te wees nie, 7 maar het Homself ontledig deur die gestalte van ‘n dienskneg aan te neem en aan die mense gelyk geword; 8 en in gedaante gevind as ‘n mens, het Hy Homself verneder deur gehoorsaam te word tot die dood toe, ja, die dood van die kruis. 9 Daarom het God Hom ook uitermate verhoog en Hom ‘n naam gegee wat bo elke naam is,”
Dit is ‘n gesindheid soos wat in Christus was wat God verheerlik en wat met genadeloon en gesagsposisies in die komende Koninkryk beloon gaan word. Ons almal behoort bietjie introspeksie te gaan doen om vas te stel met watter gesindheid ons God en ons medemens dien. God se karakter is fundamenteel liefdevol, genadig en regverdig en Hy verwag van ons om toenemend soos Hy te word. Dit is my bede dat hierdie artikel ons almal sal aanspoor om God en ons medemens vanuit ‘n rein hart te dien.
Seën groete!