Die Onveranderlike Aard van God se Gawe en Karakter
Aangesien die mens geensins verdien om gered te word nie en boonop onvermoënd is om homself te red, kan hy die ewige lewe slegs as ‘n geskenk deur geloof by God ontvang. Dit volg logies dat indien die mens niks kon doen om hierdie geskenk te verdien nie, hy ook niks kan doen om dit weer te verloor nie. God is nie soos ‘n mens dat Hy sou lieg of ‘n geskenk, wat Hy kosteloos en uit genade gegee het, weer sou terugneem nie. Die vrye gawe van die ewige lewe is per definisie ewigdurend; dit kan nie ongedaan gemaak, nietig verklaar, omgekeer of beëindig word deur enige gedagte, daad of selfs ‘n latere verandering in die geloof van die wedergebore persoon nie. Die ewige sekuriteit van die gelowige berus op ‘n onverbreekbare verhouding met God, wat geanker is in Sy integriteit, absolute geregtigheid en onmeetbare liefde. Met die aanvanklike geloof in die Evangelie vestig die Here ‘n permanente Vader-kind verhouding wat Hy, ongeag die gelowige se latere optrede, nooit sal verbreek nie. Dit is God wat hierdie verhouding inisieer en na die oomblik van wedergeboorte onderhou, nie die mens nie.
