Alle bydraes deur Vic

Gelykenisse

Die Gelykenis van die Twee Seuns

Agtergrond tot die Gelykenis

Jesus het Homself as die Koning en die Messias van die Jode voorgestel toe Hy Jerusalem op die rug van ‘n donkie ingery het (Matteus 21:1-11). Vir enige Jood wat die Skrifte geken het, sou dit duidelik gewees het wat die Here hier doen, aangesien die profete vooraf daarvan getuig het:
Sagaria 9:9 “Verheug jou grootliks, o dogter van Sion! Juig, o dogter van Jerusalem! Kyk, jou Koning kom na jou; regverdig en ‘n oorwinnaar is Hy; nederig en Hy ry op ‘n esel—op ‘n jong esel, die vul van ‘n eselin.”

Later het Jesus die tempel binnegegaan en almal wat handel dryf, uitgejaag; Hy het ook die tafels van die geldwisselaars omgegooi (Matteus 21:12-17). Dit was die tweede keer dat Jesus die tempel gereinig het. Die vorige keer het ongeveer ‘n jaar voor hierdie gebeurtenis plaasgevind en dit het geen blywende vrugte opgelewer nie (Johannes 2:13-16). Nadat Jesus die handelaars verjaag het, het die blindes en kreupeles na Hom gekom en Hy het hulle gesond gemaak (Matteus 21:14).

Lees meer Die Gelykenis van die Twee Seuns →

Vraag en antwoord

Voorspoed Evangelie

Vraag: Wat is jou siening oor die Voorspoedevangelie (Prosperity Gospel)? Kan dit uit die Bybel geregverdig word? Ek weet van mense wat swaarkry en daarin glo, maar dit klink of jy soms negatief is oor wat hulle verkondig.

Antwoord: Om mee te begin, glo ek dat die Voorspoedevangelie nie die Evangelie is wat die Here aan ons as gelowiges gegee het om te verkondig nie. Dit is ’n “ander evangelie” wat nie red nie en daartoe sal lei dat baie mense wat dink hulle is gered, uiteindelik verlore gaan. Ek vra dat u hierdie verduideliking biddend sal deurlees en self sal oordeel of dit die waarheid is. Vergelyk alles wat ek of enigiemand anders aan u meedeel met die Bybel, om te verseker dat dit die suiwer waarheid is!

Jesus het aarde toe gekom om sondaars te red, nie om mense ryk te maak nie.
Lukas 5:32 “Ek het nie gekom om regverdiges te roep nie, maar sondaars tot bekering.”
Nêrens in die Skrif word gemeld dat Christus gekom het vir ons materiële verryking nie. Hy het gekom om ons van ons sondes te verlos, nie om ons in ons vleeslike begeertes te versterk nie.
1 Timoteus 6:10-11 “Want die geldgierigheid is ‘n wortel van alle euwels; en omdat sommige dit begeer, het hulle afgedwaal van die geloof en hulleself met baie smarte deurboor. Maar jy, man van God, vlug van hierdie dinge weg, en jaag ná die geregtigheid, godsaligheid, geloof, liefde, lydsaamheid, sagmoedigheid.”

Lees meer Voorspoed Evangelie →

Christelike leefwyse

Alles Werk Ten Goede vir die wat in Jesus glo!

Romeine 8:28 “En ons weet dat vir hulle wat God liefhet, alles ten goede meewerk, vir hulle wat na sy voorneme geroep is.”
Ons wat weet dat ons die Here liefhet, hoef nooit terneergedruk of bang te wees nie. Dit maak nie saak hoe hopeloos ons saak mag lyk, of hoe donker ons lewe op hierdie oomblik mag voorkom nie. Ons kan verseker weet dat die Here alle omstandighede en gebeure gebruik om dit tot ons voordeel te laat saamwerk. Al beteken dit dat ons vir ’n kort tydjie lyding moet deurstaan, moet ons op God vertrou en weet dat Hy net die beste vir ons wil hê. Ons moet besef dat God nie net binne die kort tydsbestek van hierdie wêreld werk nie, maar met die ewigheid in gedagte. Hy bestuur alles volgens ’n plan en ons moet ons daarin berus. Hy sal ons nooit verlaat of in die steek laat nie.

Romeine 8:18 “Want ek reken dat die lyding van die teenwoordige tyd nie opweeg teen die heerlikheid wat aan ons geopenbaar sal word nie.”
As gelowiges word ons nie van lyding gevrywaar nie, maar ons het die versekering dat die Here met ons is en dat Hy ons die genade sal skenk om ons deur alle beproewinge te dra. Boonop het ons ’n hoop wat verder strek as hierdie tydelike wêreld. Ons sal saam met Jesus verheerlik word wanneer Hy aarde toe kom om as Koning te regeer. Dan sal ons saam met Hom verskyn om in Sy heerlikheid te deel.
Romeine 8:17 “en as ons kinders is, dan ook erfgename, erfgename van God en mede-erfgename van Christus, as ons naamlik saam met Hom ly, sodat ons ook saam met Hom verheerlik kan word.”

 

Lees meer Alles Werk Ten Goede vir die wat in Jesus glo! →

Vraag en antwoord

Sukkel met Sonde

Vraag: Ek hoop jy kan my raad gee. Ek sukkel met ‘n sonde wat ek net nie kan oorkom nie. Ek pleeg dit en voel dan geweldig skuldig; ek probeer ophou, net om weer te val. Ek dink nie ek is gered nie en ek wil nie verlore gaan nie. Ek glo die Evangelie, maar bly struikel, en dit maak my verskriklik bang vir verse soos 1 Korintiërs 6:10. Kan jy my help asseblief?

Antwoord: Eerstens wil ek u aanraai om nie oorhaastig vreesbevange te raak wanneer u struikel nie. Die feit is dat ons almal struikel. Die Here weet terdeë dat ons as mense nie die wet volkome kan gehoorsaam nie. Ons word met ‘n sondenatuur gebore; daarom sondig ons. Dit is juis waarom Jesus Christus gekom het om in ons plek vir ons sondes te sterf. Indien dit vir ons moontlik was om sondeloos te lewe, sou Christus se kruisdood onnodig gewees het.
Romeine 5:8 “maar God bewys sy liefde tot ons daarin dat Christus vir ons gesterf het toe ons nog sondaars was.”

Lees meer Sukkel met Sonde →

Valse leerstellings

Krag in ons Woorde?

Daar is deesdae ‘n gewilde konsep in die kerk wat beweer dat ons woorde krag het. Volgens hierdie siening kan ons, indien ons genoeg geloof het en die regte woorde uitspreek, rykdom, gesondheid en geluk verkry deur positiewe uitsprake oor ons omstandighede te maak. Daar word ook beweer dat mens nooit negatiewe uitsprake mag maak nie, aangesien woorde kwansuis die vermoë het om in die werklikheid te manifesteer. Die argument lui dat aangesien God die wêreld deur Sy woord geskape het, en ons in Sy beeld geskape is, ons in die “God-klas” val en dus self met ons woorde kan skep.

Die vraag wat ons egter moet beantwoord, is of hierdie leerstelling skriftuurlik geregverdig kan word. Of is dit maar net ‘n moderne vorm van gnostisisme? As Christene moet ons ons lewens inrig volgens die Woord van God alleen.
2 Timoteus 3:16-17 “Die hele Skrif is deur God ingegee en is nuttig tot lering, tot weerlegging, tot teregwysing, tot onderwysing in die geregtigheid, sodat die mens van God volkome kan wees, vir elke goeie werk volkome toegerus.”

Lees meer Krag in ons Woorde? →

Brood Brokkies

Moenie Moedeloos word nie!

Ons almal kom op een of ander tyd in ons lewens by ‘n punt waar ons voel ons kan nie meer nie. Dit gebeur veral wanneer iemand werklik vir die Here wil leef en Hom wil dien. Ek glo vas dat almal wat die Here opreg dien, en nie hulleself nie, soms moedeloos sal voel omdat dinge nie uitwerk soos beplan nie. Die rede hiervoor is dat die satan en sy werkers ons op alle vlakke sal teëstaan. Dit is juis hier waar ons moet ophou om in eie krag voort te beur; ons moet onsself volkome aan God oorgee en na Hom alleen kyk vir ‘n suksesvolle uitkoms.

Anthony Norris Groves wou vir die Here werk en het dit ook gedoen, maar na jare se arbeid en vele terugslae het hy gesterf met die gevoel dat sy lewe ‘n mislukking was. Die Here het sy lewe egter nie as ‘n mislukking gesien nie. Sy werk het na sy dood in Mei 1853 ryke vrug gedra, tot so ‘n mate dat hy vandag as die “vader van geloofsending” beskou word. Watter geweldige eer is dit nie! Hy het nooit die volle vrug van sy arbeid hier op aarde waargeneem nie, maar dink net watter loon hy by die Here sal ontvang.

Lees meer Moenie Moedeloos word nie! →

Vraag en antwoord

Is die boek Openbaring Volledig?

Vraag: Kan jy vir my asseblief kommentaar lewer op die feit dat iemand meen dat die boek Openbaring nog nie klaar geskryf is nie en dat mens nog openbaringsinligting daarby kan voeg? In Openbaring 22:18 staan dat niks bygevoeg of weggelaat mag word nie, asook in Deuteronomium 4:2.

Antwoord: Baie dankie vir die vraag; dit is ’n uitstekende en relevante navraag. Met die Here se hulp sal ek poog om u vraag so bondig moontlik te beantwoord. Onthou, ek is net ’n mens en kan foute maak. Toets asseblief alles wat ek sê aan die Skrif!

Die Bybel, vanaf Genesis tot en met die einde van Openbaring, is ’n progressiewe openbaarmaking van God aan die mens. Dit is noodwendig ook die openbaarmaking van Jesus Christus aan die mensdom; dit vertel hoe die mens in sonde verval het en hoe God in Sy genade die gevalle mensdom verlos het. (Die leser word ten sterkste aangeraai om die reeks artikels “Die Duiwel se aktiwiteit sover dit die gelowige aanbetref” te lees, wat die mens se geskiedenis en die satan se betrokkenheid in diepte bespreek).

Lees meer Is die boek Openbaring Volledig? →

Brood Brokkies

Soekers van Ydele Eer

Gal. 5:22-26 “Maar die vrug van die Gees is liefde, blydskap, vrede, lankmoedigheid, vriendelikheid, goedheid, getrouheid, sagmoedigheid, selfbeheersing. Teen sulke dinge is die wet nie. Maar die wat aan Christus behoort, het die vlees met sy hartstogte en begeerlikhede gekruisig. As ons deur die Gees lewe, laat ons ook deur die Gees wandel. Laat ons nie word soekers van ydele eer wat mekaar uittart en mekaar beny nie.”
‘n Ware Christen is nie veronderstel om oor homself te spog nie, maar moet in die Here roem (1 Ko 1:26–31). Wettiese mense vergelyk hulleself dikwels met ander en spog dan met hul goeie werke, asof hierdie werke hulle meer aanvaarbaar voor God maak. Sulke mense vergeet egter dat al ons eie geregtighede soos besoedelde klere voor God is.
Jes. 64:6 “En ons het almal geword soos ’n onreine, en al ons geregtighede soos ’n besoedelde kleed; en ons het almal verdor soos blare, en ons ongeregtighede het ons weggevoer soos die wind.”

Lees meer Soekers van Ydele Eer →

Vraag en antwoord

Val in die Gees?

Vraag: Is dit skriftuurlik om in die Gees te val?

Antwoord: Die vraag wat ons hier moet beantwoord, is of die apostels van Jesus ons op enige plek in die Bybel beveel het om “in die Gees te val”. Die antwoord is nee; ons word nêrens in die Bybel so ’n opdrag gegee nie. Ons word wel beveel om in die Gees te wandel. Die vraag wat ons dan moet vra, is: Hoe wandel ’n mens in die Gees? Kom ons raadpleeg die Skrif vir die antwoord.

Johannes 15:5 “Ek is die wynstok, julle die lote. Wie in My bly, en Ek in hom, hy dra veel vrug; want sonder My kan julle niks doen nie.”
Hier sien ons dat die Here ons die opdrag gee om in Hom te bly, en dan gee Hy aan ons die versekering dat ons veel vrug sal dra. Is dit deel van vrug dra om “in die Gees te val”, soos wat sommige mense beweer? Vir ’n antwoord gaan ons weer na die Skrifte om te sien wat die vrugte is waarvan die Here hier praat.

Lees meer Val in die Gees? →

Gelykenisse

Die Gelykenis van die Arbeiders in die Wingerd

Voordat ons begin, moet ons eers kennis neem dat Jesus hierdie gelykenis vertel het as ‘n verdere verduideliking op ‘n vraag wat Petrus Hom gevra het.

Matt.19:27 “Daarop antwoord Petrus en sê vir Hom: Kyk, ons het alles verlaat en U gevolg. Wat sal daar dan vir ons wees? 28 En Jesus sê vir hulle: Voorwaar Ek sê vir julle dat julle wat My gevolg het, in die wedergeboorte (wanneer alles nuut gemaak word) wanneer die Seun van die mens op sy heerlike troon gaan sit, julle ook op twaalf trone sal sit en die twaalf stamme van Israel sal oordeel. 29 En elkeen wat huise of broers of susters of vader of moeder of vrou of 1kinders of grond ter wille van my Naam verlaat het, sal honderd maal soveel ontvang en die ewige lewe beërwe.”
Opmerking: Let op dat die Here verwys na die wedergeboorte, d.w.s. die millennium, wanneer Jesus fisies op aarde sal wees en Sy Messiaanse Koninkryk sal oprig. Dit sal die tyd wees wanneer Jesus die koninkryk geestelik (Jesaja 2:3; 4:2-4 en 11:9) polities (Jesaja 2:4; 11:1-5; 11:10 -11 en 32:16 – 18), asook geografies en fisies (Jesaja 2:2; 4:5 – 6; 11:6 – 9; 35: 1 – 2) gaan vestig. Hy gaan op die herstelde troon van Dawid sit en die wêreld vir duisend jaar lank regeer (Mattheüs 25:31). Dit alles vind hier op aarde, in die fisiese geografiese landgebied van Israel plaas. Dit is opmerklik dat die dissipels vir getroue diens aan God beloon gaan word met genadeloon, wat gesagsposisies van administrasie en heerskappy in die vrederyk van Jesus insluit (Lukas 19:17-27). Lees asb. die artikels “Die gelykenis van die Ponde” asook “Gelowiges se werke gaan beoordeel word”.

Lees meer Die Gelykenis van die Arbeiders in die Wingerd →