Ps. 86:5 “Want U, o Here, is goed en vergewensgesind en groot van goedertierenheid vir almal wat U aanroep. 86:15 Maar U, Here, is ‘n barmhartige en genadige God, lankmoedig en groot van goedertierenheid en trou.”
Hoe dankbaar is ek nie wanneer ek gestruikel het, om teksgedeeltes soos hierbo te lees en daaroor na te dink nie. Dit is dikwels so maklik om te struikel; as dit nie vir God se genade was nie, weet ek nie waar ek vandag sou gewees het nie.

Om te verstaan hoe God met ons struikelings handel, moet ons eers die onderskeid verstaan tussen ons Posisionele Heiligmaking en ons Praktiese Heiligmaking:

• Posisionele Heiligmaking (Regverdigmaking): Dit is jou status voor God. Die oomblik toe jy geglo het, het God jou “heilig” verklaar op grond van Christus se toegerekende geregtigheid op grond van Sy voltooide werk (1Ko 6:11). Hierdie status is onveranderlik en verseker jou redding van die straf van die sonde.

• Praktiese Heiligmaking (Dissipelskap): Dit is jou daaglikse wandel en groei in heiligheid. Dit kan wissel na gelang van jou gehoorsaamheid. Dit gaan oor jou redding van die mag van die sonde in jou alledaagse lewe (1Pe 1:15).

Elke oggend nader ek God in gebed om Hom te bedank vir die geduld en genade wat Hy steeds met my en my praktiese tekortkominge aan die dag lê. Ek verwonder my opnuut aan die volkomenheid van God se Woord, wat weereens bewys dat die Bybel nie deur die wil van die mens voortgebring is nie, maar deur God alleen. Die Here ken ons en weet hoe maklik ons struikel, en daarom het Hy voorsiening gemaak vir die herstel van ons gemeenskap met Hom.
1Joh. 2:1 “My kinders, ek skryf hierdie dinge aan julle, dat julle nie moet sondig nie; en as iemand gesondig het, ons het ‘n Voorspraak by die Vader, Jesus Christus, die Regverdige. 2:2 En Hy is ‘n versoening vir ons sondes, en nie alleen vir ons s’n nie, maar ook vir dié van die hele wêreld.”

Dit beteken nie dat ek nou maar moed opgee en in sonde verval nie. Geen ware kind van die Here wil in sonde voortleef nie, maar sal onmiddellik deur die Heilige Gees van sy sonde oortuig word. Die Here verlang dat die persoon sy sonde bely, dit laat staan en vergifnis vra, om sodoende prakties deur Jesus se bloed gereinig te word.
1Joh. 1:7 “Maar as ons in die lig wandel soos Hy in die lig is, dan het ons gemeenskap met mekaar; en die bloed van Jesus Christus, sy Seun, reinig ons van alle sonde.”

Ons moenie ons sondes probeer wegsteek nie, maar dit aan God openbaar en Hom vra om ons daarmee te help. Om sonde te verbloem vererger die saak en dwing die Here om in te gryp en ons te tugtig (Heb 12:6).
1Joh. 2:3 “En hieraan weet ons dat ons Hom ken: as ons sy gebooie bewaar… 2:6 Hy wat sê dat hy in Hom bly, behoort self ook so te wandel soos Hy gewandel het.”
Alhoewel ons as kinders van God streef om soos ons Herder te wandel, skiet ons nog steeds tekort. Ons kan egter verseker weet dat wanneer ons ons sondes bely, Hy altyd getrou sal wees om ons te vergewe en die gemeenskap te herstel.
1Jo 1:9 “As ons ons sondes bely, Hy is getrou en regverdig om ons die sondes te vergewe en ons van alle ongeregtigheid te reinig.”

Onthou egter dat hierdie nie ‘n lisensie is om te sondig nie. Ons is saam met Christus gekruisig en die Here leef nou deur ons!
Gal 2:20 “Ek is met Christus gekruisig, en ék leef nie meer nie, maar Christus leef in my. En wat ek nou in die vlees lewe, leef ek deur die geloof in die Seun van God wat my liefgehad het en Homself vir my oorgegee het.”

Wanneer Romeine 6 sê ons moet onsself as “dood vir die sonde” reken, roep dit ons op om ons praktiese lewe in lyn te bring met ons posisionele status.
Rom 6:11 “So moet julle ook reken dat julle wel vir die sonde dood is, maar lewend is vir God in Christus Jesus, onse Here… 6:14 Want die sonde sal oor julle nie heers nie; want julle is nie onder die wet nie, maar onder die genade.”

As ek struikel, moet ek gaan kyk wat ek verkeerd gedoen het, want op daardie oomblik het ek myself nie as dood vir die sondige natuur gereken nie. Ek moet dan tot inkeer kom en in geloof myself weer as saam met Christus gekruisig reken, sodat Hy deur my kan leef. Dit is ’n wilsbesluit wat ons in geloof neem, terwyl ons op die inwonende Heilige Gees vertrou om ons die krag te verleen.
1Kor. 10:13 “Geen versoeking het julle aangegryp behalwe ‘n menslike nie; maar God is getrou, wat nie sal toelaat dat julle bo julle kragte versoek word nie…”
Mar.14:38 “Waak en bid, dat julle nie in versoeking kom nie. Die gees is wel gewillig, maar die vlees is swak.”

Onthou, ‘n kind van die Here bly nie in die modder van sonde lê nie; hy staan op om gewas te word.
Spr. 24:16 “Want sewe maal val die regverdige en staan weer op, maar die goddelose struikel in die ongeluk.”
Ek bid dat die Here ons almal sal bystaan om deur ons lewenswandel te bewys dat ons Hom waarlik liefhet en dat Sy Naam daardeur verheerlik mag word.

Ter Afsluiting: Dit is belangrik om Posisionele Heiligmaking (Regverdigmaking), en Praktiese Heiligmaking (Groei in Heiligheid) korrek te onderkei.

1. Posisionele Heiligmaking (Regverdigmaking)

Dit is ’n eenmalige, geregtelike handeling van God op die oomblik dat jy glo. Dit handel oor jou status voor God.

• Teks: “Maar julle is afgewas, maar julle is geheilig, maar julle is geregverdig in die Naam van die Here Jesus en deur die Gees van onse God.” (1 Korintiërs 6:11).
• Aard: Dit is volmaak en onveranderlik. Jy is “in Christus” en word as heilig beskou omdat Christus se geregtigheid aan jou toegereken is.
• Fokus: Jou redding van die straf van die sonde (die hel).

2. Praktiese Heiligmaking (Groei in Heiligheid)

Dit is ’n deurlopende proses wat lewenslank duur. Dit handel oor jou toestand en daaglikse wandel.

• Teks: “Maar soos Hy wat julle geroep het, heilig is, moet julle ook self heilig word in julle hele lewenswandel.” (1 Petrus 1:15).
• Aard: Dit is progressief en kan wissel. Dit hang af van jou gehoorsaamheid, die bestudering van die Woord en die oorgawe aan die Heilige Gees.
• Fokus: Jou redding van die mag van die sonde in jou daaglikse lewe.

Ek bid dat die Here ons almal sal bystaan om deur ons lewenswandel te bewys dat ons Hom waarlik liefhet en dat Sy Naam daardeur verheerlik mag word.

Seën groete, Vic