Die wysheid van Salomo waarsku ons in Spreuke 20:19: “Wie met kwaadsprekery omgaan, maak ‘n geheim openbaar; laat jou dus nie in met een wat sy lippe laat oopstaan nie.”
Dit is aangrypend om te dink aan die seerkry en trane wat ‘n skindertong al veroorsaak het. Ongelukkig is dit dikwels nie net ongelowiges nie, maar juis gelowiges — mense wat veronderstel is om Jesus se ambassadeurs op aarde te wees — wat hulle hieraan skuldig maak. Hoeveel keer het ons nie al in ‘n Bybelstudiegroep gesit waar ‘n persoon sleggesê word terwyl hy nie teenwoordig is om homself te verdedig nie?
Ons verskoon dikwels ons gedrag deur te beweer dat ons die persoon bespreek omdat ons “omgee” of wil “help”. Die eenvoudige waarheid is egter dikwels dat ons nie werklik omgee nie, maar dat ons ‘n sondige genot daarin vind om ander te kritiseer terwyl ons ons eie foute ignoreer. As ons werklik vir iemand omgee, sal ons nie daardie persoon met ander bespreek nie, maar direk na hom of haar gaan om die saak in liefde te hanteer. Sou dit nie baie voordeliger vir die persoon wees nie?
Tog is dit dikwels makliker om ons tonge soos skerp messe in iemand se rug te laat glip as om hulle prontuit te konfronteer. In ‘n direkte gesprek kan die persoon homself verdedig, en dan trek ons dalk aan die kortste ent. Miskien is hy bewus van ons eie tekortkominge, en as hy dit sou noem, sou die groep eers werklik rede hê om te skinder.
Die Heilige Gees het Jakobus geïnspireer om die ware oorsprong van skinder bloot te lê in Jakobus 3:6: “Die tong is ook ‘n vuur, die wêreld van ongeregtigheid. Net so ‘n plek neem die tong onder ons lede in; dit besmet die hele liggaam en steek die hele lewensloop aan die brand en word uit die hel aangesteek.”
Daar bestaan nie ‘n kragtiger beskrywing van ‘n skindertong as dit nie. Vir die Here is niks onsigbaar nie; Hy ken die bron van ons woorde, ongeag wat ons beweer. Verder vermaan die Here ons ernstig in Jakobus 1:26: “As iemand onder julle meen dat hy godsdienstig is en sy tong nie in toom hou nie, maar sy hart mislei, die godsdiens van hierdie man is tevergeefs.”
Niks maak die Christendom so ‘n bespotting in die oë van die wêreld as ‘n persoon wat bely dat hy ‘n Christen is, maar in openlike sonde leef nie. Skinder is een van die sigbaarste sondes omdat dit ‘n gehoor vereis. ‘n Skinderbek soek altyd ‘n gewillige oor vir sy gif. Hoewel sonde in ‘n gemeente aangespreek moet word, moet ons die stappe volg wat die Here in Sy Woord voorskryf, wat ons nooit die reg gee om mense agter hul rug te belaster nie.
Paulus gee vir ons ‘n voorbeeld van deursigtigheid in 1 Korinthiërs 1:11: “Want dit is aan my deur die huisgenote van Chloë bekend gemaak aangaande julle, my broeders, dat daar twiste onder julle is.”
Wanneer iemand ‘n saak oor ‘n ander wil rapporteer, moet hy bereid wees dat sy naam genoem word. As iemand nie bereid is om verantwoordelikheid vir sy woorde te aanvaar nie, is dit bloot skinder en behoort ons nie daarna te luister nie. Deur te luister, help ons die ander persoon in sy sonde en word ons self deel van die probleem.
‘n Skindertong bou nooit op nie; dit vernietig karakters. Onthou: as iemand ander mense by jou beskinder, kan jy verseker wees dat hy jóú ook by ander gaan beskinder. Met dieselfde mate waarmee hy ander slegsê, sal hy jou slegsê. So iemand is nie werklik ‘n vriend nie, maar iemand wat jou ondergang bewerkstellig. Hoe kan jy ooit ‘n persoonlike probleem met so ‘n persoon deel? Paulus beveel ons daarom in 1 Korinthiërs 5:11: “…om nie om te gaan met iemand wat, al staan hy as ‘n broeder bekend, ‘n hoereerder is of ‘n gierigaard of ‘n afgodedienaar of ‘n kwaadspreker of ‘n dronkaard of ‘n rower nie; met so iemand moet julle selfs nie saam eet nie.”
Kom ons kom tot inkeer en verheerlik die Here deur mense waarlik lief te hê. Kom ons hou op om in ander se sake in te meng en fokus op ons eie wandel met God. Gun ander die vryheid om vir die Here te leef soos Hy hulle lei. As ons oortuig is dat hulle sondig, laat ons die moed hê om hulle van aangesig tot aangesig te spreek.
Ten slotte: Hoe staan jy in jou gemeenskap bekend? As die dorp se “lopende koerant”, of sien mense Jesus in jou raak? Onthou, jy is dalk die enigste geleentheid vir iemand om die beeld van Christus te sien. Skinder veroorsaak jaarliks meer trane as wat oorloë bloed vergiet. Dit is werklik hartverskeurend.
Seëngroete, Vic