Kategorie se argiewe: Christelike leefwyse

Christelike leefwyse

Ouers as voorbeeld aan Kinders

Die Ouer as Voorbeeld of Struikelblok: ‘n Ernstige Waarskuwing

Die Here het ‘n baie ernstige waarskuwing in die Bybel gegee aan diegene wat veroorsaak dat ‘n kind wat in Hom glo, struikel.
Matt.18:5 “En elkeen wat een van sulke kindertjies in my Naam ontvang, ontvang My; 18:6 maar elkeen wat een van hierdie kleintjies wat in My glo, laat struikel, dit is vir hom beter dat ‘n meulsteen aan sy nek gehang word en hy wegsink in die diepte van die see. 18:7 Wee die wêreld weens die struikelblokke! Want dit is noodsaaklik dat daar struikelblokke kom, maar wee die mens deur wie die struikelblok kom.”

Wat sien ons kinders daagliks in ons optrede as ouers? Wat is die voorbeeld wat ons aan hulle stel? ‘n Ouer se optrede beteken baie meer as net leë woorde. ‘n Kind sal nie ‘n pa wat gereeld in ‘n kroeg kuier ernstig opneem wanneer hy daardie selfde kind teen die gevare van drankmisbruik waarsku nie. Kinders kyk op na hul ouers as rolmodelle en volg na wat hulle waarneem. Indien ‘n ouer drankmisbruik as normaal vertoon, sal die kind dit dikwels as sodanig aanvaar.

Lees meer Ouers as voorbeeld aan Kinders →
Christelike leefwyse

Wanneer ons Sterf

Die Gelowige en die Dood: ‘n Oorgang van Lig tot Lig

Hierdie is nie juis een van die mees aangenaamste onderwerpe om oor te skryf nie, maar die feit bly staan dat ons almal die een of ander tyd gaan sterf (indien ons gelukkig is, sal ons deel van die groep gelowiges wees wat die dood d.m.v. die wegraping sal vryspring). Vir baie mense is die gedagte van die dood iets vreesliks, maar vir die gelowige hoef dit nie die geval te wees nie.

Onthou dat die Bybel nooit die dood as uitwissing van bestaan omskryf nie, maar wel as skeiding. Indien iemand sterf, dan sterf net sy fisiese liggaam, maar sy gees en siel bly bewustelik voortbestaan. Die verhaal van Lasarus en die ryk man demonstreer hierdie waarheid baie mooi (Luk 16:19–31).

Lees meer Wanneer ons Sterf →
Christelike leefwyse, Vergifnis

Genade vir die wat Struikel: Ons Posisie vs. Ons Wandel

Ps. 86:5 “Want U, o Here, is goed en vergewensgesind en groot van goedertierenheid vir almal wat U aanroep. 86:15 Maar U, Here, is ‘n barmhartige en genadige God, lankmoedig en groot van goedertierenheid en trou.”
Hoe dankbaar is ek nie wanneer ek gestruikel het, om teksgedeeltes soos hierbo te lees en daaroor na te dink nie. Dit is dikwels so maklik om te struikel; as dit nie vir God se genade was nie, weet ek nie waar ek vandag sou gewees het nie.

Om te verstaan hoe God met ons struikelings handel, moet ons eers die onderskeid verstaan tussen ons Posisionele Heiligmaking en ons Praktiese Heiligmaking:

  • Posisionele Heiligmaking (Regverdigmaking): Dit is jou status voor God. Die oomblik toe jy geglo het, het God jou “heilig” verklaar op grond van Christus se toegerekende geregtigheid op grond van Sy voltooide werk (1Ko 6:11). Hierdie status is onveranderlik en verseker jou redding van die straf van die sonde.

  • Praktiese Heiligmaking (Dissipelskap): Dit is jou daaglikse wandel en groei in heiligheid. Dit kan wissel na gelang van jou gehoorsaamheid. Dit gaan oor jou redding van die mag van die sonde in jou alledaagse lewe (1Pe 1:15).

Lees meer Genade vir die wat Struikel: Ons Posisie vs. Ons Wandel →

Christelike leefwyse

Die Gelowige en Lyding

Teenspoed, tragedie en lyding is realiteite wat ons almal op een of ander tydstip beleef. As mense wil ons dikwels verstaan waarom juis ons getref word, maar die eenvoudige waarheid is dat ons in ‘n gevalle wêreld woon. Die Here het ons nêrens belowe dat ons lyding sal vryspring wanneer ons Hom as Verlosser aanneem nie. Tog bied die Woord van God waardevolle leidrade wat ons help om lyding te verstaan en te hanteer — hetsy in ons eie lewens of wanneer ons ‘n broeder in nood bystaan. Mense wat verkondig dat gelowiges slegs voorspoed sal ervaar, verkondig leuens wat dikwels tot gevolg het dat mense permanent van die Here af wegdraai wanneer dinge skeefloop. Hier volg ‘n paar redes waarom lyding in die lewe van ‘n gelowige toegelaat word.

Lees meer Die Gelowige en Lyding →

Christelike leefwyse

Alles Werk Ten Goede vir die wat in Jesus glo!

Romeine 8:28 “En ons weet dat vir hulle wat God liefhet, alles ten goede meewerk, vir hulle wat na sy voorneme geroep is.”
Ons wat weet dat ons die Here liefhet, hoef nooit terneergedruk of bang te wees nie. Dit maak nie saak hoe hopeloos ons saak mag lyk, of hoe donker ons lewe op hierdie oomblik mag voorkom nie. Ons kan verseker weet dat die Here alle omstandighede en gebeure gebruik om dit tot ons voordeel te laat saamwerk. Al beteken dit dat ons vir ’n kort tydjie lyding moet deurstaan, moet ons op God vertrou en weet dat Hy net die beste vir ons wil hê. Ons moet besef dat God nie net binne die kort tydsbestek van hierdie wêreld werk nie, maar met die ewigheid in gedagte. Hy bestuur alles volgens ’n plan en ons moet ons daarin berus. Hy sal ons nooit verlaat of in die steek laat nie.

Romeine 8:18 “Want ek reken dat die lyding van die teenwoordige tyd nie opweeg teen die heerlikheid wat aan ons geopenbaar sal word nie.”
As gelowiges word ons nie van lyding gevrywaar nie, maar ons het die versekering dat die Here met ons is en dat Hy ons die genade sal skenk om ons deur alle beproewinge te dra. Boonop het ons ’n hoop wat verder strek as hierdie tydelike wêreld. Ons sal saam met Jesus verheerlik word wanneer Hy aarde toe kom om as Koning te regeer. Dan sal ons saam met Hom verskyn om in Sy heerlikheid te deel.
Romeine 8:17 “en as ons kinders is, dan ook erfgename, erfgename van God en mede-erfgename van Christus, as ons naamlik saam met Hom ly, sodat ons ook saam met Hom verheerlik kan word.”

 

Lees meer Alles Werk Ten Goede vir die wat in Jesus glo! →

Christelike leefwyse

Juk jou Ore? Wat sê die Bybel werklik?

Wil ons werklik hoor wat die Here aan ons wil sê, of wil ons net hoor wat ons sondige natuur begeer? As daar ooit ‘n tyd was om Paulus se waarskuwing aan Timoteus ernstig op te neem, is dit nou, in hierdie dae waarin ons leef.
2Ti 4:3 “want daar sal ‘n tyd wees wanneer hulle die gesonde leer nie sal verdra nie, maar, omdat hulle in hul gehoor gestreel wil wees, vir hulle ‘n menigte leraars sal versamel volgens hulle eie begeerlikhede, 4:4 en die oor sal afkeer van die waarheid en hulle sal wend tot fabels.”

Is dit nie wat tans in die grootste gedeelte van die belydende Christendom gebeur nie? Praat van leerstellings en mense kyk jou skeef aan. Ek het gehoor hoe ‘n gewilde televisieprediker verkondig dat doktrines die kerk verdeel. Dink net by jouself: as ‘n prediker nie leerstellings verkondig nie, wat verkondig hy dan? Waarom het ons dan nog die Bybel? Moet die Bybel nie ons leerstellings bepaal nie? As die Bybel nie die laaste woord in die bepaling van doktrines is nie, kan enigiets as die waarheid verkondig word. Dit sal chaos tot gevolg hê – en is dit nie miskien wat ons vandag in die belydende Christendom waarneem nie?

Lees meer Juk jou Ore? Wat sê die Bybel werklik? →

Christelike leefwyse

Skinder: Die Verwoestende Krag van die Skindertong

Die wysheid van Salomo waarsku ons in Spreuke 20:19: “Wie met kwaadsprekery omgaan, maak ‘n geheim openbaar; laat jou dus nie in met een wat sy lippe laat oopstaan nie.”
Dit is aangrypend om te dink aan die seerkry en trane wat ‘n skindertong al veroorsaak het. Ongelukkig is dit dikwels nie net ongelowiges nie, maar juis gelowiges — mense wat veronderstel is om Jesus se ambassadeurs op aarde te wees — wat hulle hieraan skuldig maak. Hoeveel keer het ons nie al in ‘n Bybelstudiegroep gesit waar ‘n persoon sleggesê word terwyl hy nie teenwoordig is om homself te verdedig nie?

Ons verskoon dikwels ons gedrag deur te beweer dat ons die persoon bespreek omdat ons “omgee” of wil “help”. Die eenvoudige waarheid is egter dikwels dat ons nie werklik omgee nie, maar dat ons ‘n sondige genot daarin vind om ander te kritiseer terwyl ons ons eie foute ignoreer. As ons werklik vir iemand omgee, sal ons nie daardie persoon met ander bespreek nie, maar direk na hom of haar gaan om die saak in liefde te hanteer. Sou dit nie baie voordeliger vir die persoon wees nie?

Lees meer Skinder: Die Verwoestende Krag van die Skindertong →

Christelike leefwyse

Word met die Gees Vervul

Eféziërs 5:18: “Moenie dronk word van wyn nie—daarin is losbandigheid; maar word met die Gees vervul.”
Uit bostaande teksgedeelte is dit baie duidelik dat die apostel Paulus ons vermaan om met die Heilige Gees vervul te word. Hy praat nie hier van die ontvangs van die Gees by wedergeboorte nie, maar van die dag-tot-dag vervulling met die Heilige Gees ná wedergeboorte.
1 Korintiërs 12:13: “Want ons is almal ook deur een Gees gedoop tot een liggaam, of ons Jode of Grieke is, slawe of vrymanne; en ons is almal van een Gees deurdronge.”
Dit is belangrik om die onderskeid te merk. Anders as met wedergeboorte, waar die Heilige Gees outomaties in ons kom inwoon omdat ons die Evangelie verstaan en geglo het, word die opdrag om met die Gees vervul te word aan ons gegee—en hiervoor is ons samewerking nodig. ’n Persoon ontvang die Heilige Gees net een keer wanneer hy die Evangelie op ’n spesifieke tydstip glo.

Die vraag wat egter ontstaan, is: Wat moet ons doen om met die Gees vervul te word? Om die antwoord te kry, moet ons na die Bybel gaan en nie na buite-Bybelse praktyke of tradisies nie (waarvan daar ongelukkig baie voorbeelde in die belydende Christendom is). Die Bybel is God se Woord; ons moet ons leerstellings slegs vanuit die Skrif bekom en nie uit menslike opinies, tradisies of vleeslike manifestasies wat met die Bybel in botsing is nie.

Hier volg ’n paar Bybelse riglyne oor hoe ons deur die Gees vervul kan word, want dit is God se wil vir al Sy kinders. Onthou: om met die Heilige Gees gedoop te word, is ’n eenmalige gebeurtenis by wedergeboorte; om met die Gees vervul te word, is ’n voortdurende proses waar ons toelaat dat die Heilige Gees ons beheer.

Lees meer Word met die Gees Vervul →

Christelike leefwyse

My Vyand se Teëspoed

Spreuke 24:17 “As jou vyand val, verheug jou nie; en as hy struikel, laat jou hart nie juig nie, 24:18 dat die HERE dit nie sien en dit miskien verkeerd is in sy oë en Hy sy toorn van hom afwend nie.”
Hoe dikwels sien mens sommer die lekker op mense se gesigte, as iemand wat hulle nie van hou nie struikel, of in die moeilikheid kom. Al verdien hulle dit, mag ons as Christene nie lekker kry as ons vyande gestraf of teenspoed beleef nie. Dit wys maar net dat die Heilige Gees ons nie beheer nie en daar skort dus iets in ons geestelike lewens, naamlik heiligmaking. Ons moet ook weet, dat om so iets te doen, sonde in God se oë is en soos enige sonde moet dit bely en laat staan word. Indien ons nie hierdie sonde bely en laat staan nie mag die Here dalk besluit om ons ook te tugtig. Soms vat dit jare maar wees verseker, dat sonde wat nie bely en laat staan word nie,  nooit ongestraf sal bly nie. (Dit geld veral vir gelowiges wat God se tugtiging te wagte kan wees omrede God al Sy kinders tugtig sodat hulle Sy heiligheid op aarde aan ander kan reflekteer.) Het die Here Jesus Christus ons dan nie beveel  om ons vyande lief te hê nie? Het Hy nie ons  nie beveel om ons vyande, wat ons vervloek, te seën nie? Dit is ‘n verskriklike mistasting (en sonde) om lekker te kry wanneer enige iemand, insluitende ons vyande, struikel of hulleself in moeilike omstandighede bevind.

Lees meer My Vyand se Teëspoed →

Christelike leefwyse

Esau en Ons

Die Gebed van Isak en die Onvrugbaarheid van Rebekka

Gen 25:21: “En Isak het die HERE gesmeek met die oog op sy vrou, want sy was onvrugbaar; en die HERE het hom verhoor, sodat sy vrou Rebekka swanger geword het.”
Hier kan ons ‘n waardevolle les by Isak leer. In teenstelling met Abraham en Sara, wat sake in eie hande geneem het (met die geboorte van Ismael), het Isak sy probleem na die Here geneem en gewag op God se tydsberekening. Die gevolge van Abraham se gebrek aan geloof word vandag nog weerspieël in die voortdurende vyandigheid van Ismael se nageslag (die Arabiese volke) teenoor die land Israel. Om sonder God se leiding op te tree, kan langdurige en pynlike gevolge hê.

Lees meer Esau en Ons →